「正餐配角系列」而家嘅餐廳，講真都係賺你杯飲品姐！入到啲稍為有少少名氣嘅餐廳，隨便叫杯可樂都要成30幾蚊啦！老老實實，我又真係覺得好唔值囉！但係，食飯嘅時候口乾，唔通真係當自己參加毅行者，口渴到極點啊都唔嗌野飲咩！又唔係籌緊款！啱唔啱先！
話說個一日喺度食緊醬油蟹，見到隔離嗰台有一座飲品，成個倒轉嘅比薩斜塔咁樣，咪覺得好好奇囉！話哂咁特別係食緊韓國嘢竟然有個意大利地標係我面前出現，唔試都對唔住自己啦！果下嘅衝動，完全問都冇問過嗰一杯究竟係乜東東，就叫左啦！結果，原來係酒精味架！好彩我都飽經訓練，平時都係有飲下酒姐！如果唔係，無啦啦食蟹嘅時候醉晒就太過肉酸啊！
杯嘢嚟到嘅時候，完全係好似上緊物理堂咁！嘩！枝Apple Cider雖然係倒轉左，但竟然冇倒出嚟喎！我咁好奇嘅心理，梗係要搵出點解會咁啦！原來係因為下面有沙冰，然後就因為 氣壓嘅緣故令到佢唔會衝落嚟！（係唔係好似上左一堂物理堂先！仲勁過啲補習天王架！ ）好啦！扯得太遠添！咁我唯有講番杯飲品啦！其實入邊呢就有Apple Cider啦，而且仲會有Vodka, 真係就咁聽啊都已經覺得醉喇！真係嚇到我個心都離一離啊！好咁我咪膽粗粗試吓囉，一飲落去竟然又唔係好覺有vodka味喎，其實係蘋果味偏重嘅，飲落又唔係太覺得自己係飲緊酒嘅！不過其實咁先危險啊，咁樣唔覺唔覺先易醒呀！當你飲下飲下，啲沙冰重左啲嗰樽Apple Cider就會自己慢慢咁流落嚟，又幾方便喎！（得啦！我知我係大鄉里啦！ ）我講真，你一杯飲品真係男女老幼都啱飲！下次去到呢間餐廳，不妨叫杯嚟試吓啦！咁大杯，都只不過係＄78 ! 點計都平過杯可樂啦！你唔係仲有理由唔去試呀！ ？
韓流村
尖沙咀漆咸道南53-55號嘉芙中心地庫
Search